بـيـن نـاريـن ؟!

أنا وقلبي مابين نارين
مابين نار البعاد عني
ونار حبه اللي دوبني
وأنا تايه مابين الإتنين
أقول البعد بيقسِّي
عليَّه قلب حبِّيته
وياما البعد بينسِّي
وجرحي ف قلبي داريته
واقول اصبر عليه حبه
دا ياما ف قلبي ضمِّيته
لكن فاتني ولا بيسأل
وأنا بورودي أهديته
نسي وردي ونسي ودي
نسي عهدي اللي أعطيته
وكان عهدى نكون واحد
وكان ودي أكون بيته
ولا بكلمة سأل عني
وعذاب البعد حسيته
وآهو عقلي محيرني
وقلبي بحزني عزِّيته
يقول عقلي خلاص انسى
وقمت بقلبي صدِّيته
أقوله ازاي أعيش بعده
يموت قلبي لو انسيته
حرام ياعقلي لو أنسى
وحبه ف قلبي خليته
يعيش يكبر بنار حبي
يعيش رغم اللي قاسيته
ولا يمكن اكون قاسي
ماهوش طبعي اللي حبيته
ولكن قلبي حا يكمِّل
طريقي اللي أنا مشيته